നോവലിസ്റ്റ്,കഥാകൃത്ത്,നാടകകൃത്ത് ,ജേണലിസ്റ്റ് എന്നിങ്ങനെ ഒട്ടേറെ ബഹുമതികൾ പേറുന്ന പ്രസിദ്ധ റഷ്യൻ എഴുത്തുകാരനായ നിക്കോളെ ലെസ്ക്കോവിന്റെ 1865 ൽ പുറത്തുവന്ന നോവലാണ് മെസെൻസ്കിലെ ലേഡി മാക്ബത്ത്. നിക്കോളെ സെമ്യോണോവിച്ച് ലെസ്ക്കോവ് എന്നായിരുന്നു അദ്ദേഹത്തിന്റെ മുഴുവൻ പേര്. സ്റ്റെബ്നിറ്റ്സ്കി എന്ന പേരിലായിരുന്നു മുൻകാലങ്ങളിൽ അദ്ദേഹത്തിന്റെ രചനകൾ പ്രത്യക്ഷപ്പെട്ടിരുന്നത്. നിശബ്ദതയുടെ മറവിൽ മറഞ്ഞിരിക്കുന്ന വിനാശകരമായ വികാരങ്ങളെക്കുറിച്ചാണ് ലെസ്ക്കോവിന്റെ ഈ നോവലിൽ പ്രതിപാദിക്കുന്നത്. മെസെൻസ്കിലെ ലേഡി മാക്ബത്ത് എന്ന നോവൽ ആദ്യം പ്രത്യക്ഷപ്പെട്ടത് ദസ്തയേവ്സ്കിയുടെ ഏപോക്ക് (epoch )എന്ന മാഗസിനിലായിരുന്നു. 1865 ലായിരുന്നു അത്. റഷ്യൻ ക്ലാസിക്കുകളിൽ ഏറ്റവും ചർച്ച ചെയ്യപ്പെട്ട നോവലുകളിലൊന്നായി പിന്നീടത് മാറി.
പരമ്പരാഗതമായി ധാന്യമാവ് കച്ചവടക്കാരനായിരുന്ന സിനോവി ഇസ്മയിലോവിന്റെ ഭാര്യ കാതറീനയിലൂടെയാണ് നോവൽ ഗതിവികാസം പ്രാപിക്കുന്നത്. ഒരു ദരിദ്ര കുടുംബത്തിൽ പിറന്നതുകൊണ്ട് സ്വന്തം ഇഷ്ടത്തിനനുസരിച്ച് തന്റെ ഭർത്താവിനെ തിരഞ്ഞെടുക്കാനവൾക്ക് കഴിഞ്ഞില്ല. സിനോവിയുടെ രണ്ടാം കെട്ടായിരുന്നു ഇത്. ആദ്യ ഭാര്യയിൽ കുട്ടികളുണ്ടാകാത്തതിനെ തുടർന്നാണ് സിനോവി കാതറിനെ വിവാഹം കഴിക്കുന്നത്.
ഉയർന്ന മതിൽകെട്ടും ,സദാ സ്വൈരവിഹാരം നടത്തുന്ന കാവൽ നായ്ക്കളുള്ള അടച്ചുപൂട്ടിയ മണിമാളികയിൽ അനുഭവപ്പെടുന്ന മടുപ്പും ഏകാന്തതയും അസംതൃപ്തികളും അഭിമുഖീകരിക്കേണ്ടി വരുന്ന ഒരു സ്ത്രീയുടെ കഥയാണ് നോവൽ പറഞ്ഞു വയ്ക്കുന്നത്.വിവാഹം കഴിഞ്ഞ് അഞ്ച് വർഷമായിട്ടും ഒരു കുഞ്ഞിക്കാലു കാണാനുള്ള ഭാഗ്യം അവർക്കുണ്ടായില്ല . വീട്ടിലെ അമ്പരിപ്പിക്കുന്ന നിശബദ്ധതയും,ശൂന്യതയും എങ്ങനയൊക്കെ ഒരു സ്ത്രീയെ മാനസികമായി കീഴ്പ്പെടുത്തിക്കളയും എന്നു കാതറീന വായനക്കാർക്കു ബോധ്യപ്പെടുത്തി തരുന്നുണ്ട്. ഭർത്താവിന്റെ അഭാവം തന്റെ മേൽ അധികാരം സ്ഥാപിക്കുന്ന ഒരാളുകൂടി കുറഞ്ഞുകിട്ടിയതായി ആശ്വാസം കൊള്ളുന്നവളുമാണ് കാതറീന.
ഭർത്താവ് വളരെക്കാലമായി അകലെയായിരുന്നപ്പോൾ, കാതറീന തന്റെ ഭർത്താവിന്റെ ഗുമസ്തനായ സെർജിയുമായി പ്രണയത്തിലായി. ആ സ്നേഹം അവളെ പൂർണ്ണമായും പിടിച്ചെടുക്കുകയും ചെയ്തു. അഭിനിവേശത്തിന് ഒരു വ്യക്തിയെ തന്റെ ഏറ്റവും പ്രയാസകരമായ സാഹചര്യങ്ങളെ മറികടക്കാൻ ചിലപ്പോൾ അത്ഭുതങ്ങൾ തന്നെ പ്രവർത്തിച്ചെന്നു വരും.ഇതേ അഭിനിവേശത്തിന് ഒരു വ്യക്തിയെ കുറ്റകൃത്യത്തിലേക്ക് നയിക്കാനും അവരുടെ ജീവിതം തൽക്ഷണം നശിപ്പിക്കാനും കഴിയും .കാതറീനയുടെ അഭിനിവേശം അവളുടെ ചുറ്റുമുള്ള എല്ലാവരെയും നശിപ്പിച്ചുകൊണ്ടായിരുന്നു. മോശമായി ആരംഭിച്ചതെല്ലാം തിന്മയാൽ ശക്തിപ്പെടുന്നു എന്ന കണക്കെ ഒന്നിനു പിറകെ ഒന്നൊന്നായി ആ അഭിനിവേശത്തിനു പിറകെ കാതറീന നയിക്കപ്പെട്ടു. ഒരു സ്ത്രീ തന്റെ ശരീരത്തിലും ആത്മാവിലും ശക്തയാണ്. അവൾ സ്വാതന്ത്ര്യസ്നേഹിയും വികാരഭരിതയും ലക്ഷ്യബോധമുള്ളവളുമാണ്.നോവലിലെ കതറീന ഈ വിശേഷണങ്ങളുടെ അങ്ങേ തലത്തിൽ നിൽക്കുന്നവളുമാണ്.
ഒരു ചെറിയ നോവലിൽ , നിരവധി വലിയ സംഭവങ്ങൾ ഉൾക്കൊള്ളാൻ എഴുത്തുകാരന് കഴിഞ്ഞിട്ടുണ്ട്. മറ്റു റഷ്യൻ ക്ലാസ്സിക്കുകളുടെതു പോലെ ഒരു വമ്പൻ നൊവാലൊന്നുമല്ല മെസെൻസ്കിലെ ലേഡി മാക്ബത്ത്. ചുരുങ്ങിയ സമയത്തിനുള്ളിൽ അത്തരം സാർവത്രിക പരിവേഷങ്ങൾ വികസിപ്പിക്കാൻ ലെസ്ക്കോവ് എന്ന എഴുത്തുകാരന് കഴിഞ്ഞിട്ടുണ്ട്,
റഷ്യൻ ക്ലാസിക്കുകളിൽ അക്കാലത്ത് പൊതുവേ പ്രകടമായിരുന്ന ധാർമ്മികതയുടെ പാഠങ്ങൾ ഈ നോവലിലും കാണാം. നോവലിന് ഗുസ്താവ് ഫ്ലോബ്ബറിന്റെ മദാം ബോവറിയുമായുള്ള സാമ്യതകൾ നിരൂപകർ അന്ന് തൊട്ടേ ചൂണ്ടിക്കാട്ടിയിട്ടുണ്ട്.ഒരു സ്ത്രീയുടെ ജീവിതത്തിൽ എത്രമാത്രം വികാരങ്ങളും പുരുഷ ശ്രദ്ധയും അർത്ഥമാക്കുന്നുവെന്നും ഒരു സ്ത്രീയുടെ ആത്മാവിന് ഏകതാനത എത്രമാത്രം വിനാശകരമാണെന്നും മനസ്സിലാക്കാൻ ശ്രമിക്കുന്ന ഒരു നോവൽ കൂടിയാണിത്. ലെസ്കോവ് തന്റെ കൃതികളിൽ പൊതുവേ ഉപയോഗിച്ചുകാണാറുള്ള നാടൻ കഥകളുടെയും വാമൊഴി പാരമ്പര്യത്തിന്റെയും നുറുങ്ങുകൾ ഈ നോവലിലും ഉപയോഗിച്ചിട്ടുണ്ട്.
2016 ൽ പുറത്തിറങ്ങിയ വില്യം ഓൾഡ്റൊയ്ഡ് സംവിധാനം ചെയ്ത് ഫ്ലോറെൻസ് പ്യൂ മുഖ്യവേഷത്തിൽ പ്രത്യക്ഷപ്പെട്ട ലേഡി മാക്ബത്ത് എന്ന ഇംഗ്ലീഷ് സിനിമ ഈ നോവലിനെ ആസ്പദമാക്കിയതാണ്.
മലയാളത്തിൽ ആദ്യമായിട്ടാണ് ലെസ്ക്കോവിന്റെ പുസ്തകം വരുന്നത്.H&C ബുക്സ് പുറത്തിറക്കിയിരിക്കുന്ന പുസ്തകം വിവർത്തനം ചെയ്തിരിക്കുന്നത് തുമ്പൂര് ലോഹിതാക്ഷനാണ്.
എഴുത്തുലോകം 