മൗര്യകാലഘട്ടത്തെകുറിച്ചുള്ള അതിബൃഹത്തായ വിവരങ്ങളൊന്നും നമ്മുടെ മുന്നിലില്ല . ലഭ്യമായതിൽ പലതും ഐതിഹ്യങ്ങളും, ഭാവനകളും, അതിഭാവുകത്വങ്ങളും കൊണ്ട് കൂട്ടികുഴച്ചെടുത്ത രൂപത്തിലുള്ളതാണ്.
ഇവയിൽ നിന്നും യാഥാർഥ വസ്തുതയെ ഇഴതിരിച്ചെടുക്കുക ശ്രമകരമായ ഒരു സംഗതിയാണ്.പുരാതന ഇന്ത്യയിലെ ഏറ്റവും മഹാനായ രാജാക്കന്മാരിൽ ഒരാളായി വാഴ്ത്തപ്പെടുന്നയാളാണ് അശോക ചക്രവർത്തി. കലിംഗയുദ്ധമാണ് അദ്ദേഹത്തിനു മാനസാന്തരം വരുത്തിയെന്നു പറയപ്പെടുന്നു.
മൗര്യരാജാക്കന്മാരിൽ ചക്രവർത്തിയായിവാണ അശോകനെ ആസ്പദമാക്കി നിരവധി ലേഖനങ്ങളും ,പുസ്തകങ്ങളും എഴുതപ്പെട്ടിട്ടുണ്ട്.അശോകന്റെ വിവാദജീവിതവുമൊക്കെ അതിൽ പെടും.
വളരെ പ്രസിദ്ധമായ മൗര്യ സാമ്രാജ്യവും ,അശോകന്റെ പ്രായണങ്ങളുമൊക്കെയാണ് ശ്രേയസ്സ് ഭവേയുടെ അശോക ത്രയത്തിലെ ആദ്യപുസ്തകമായ പാടലീ പുത്രത്തിലെ യുവരാജാവ് എന്ന പുസ്തകത്തിന്റെ ഇതിവൃത്തം.
ചന്ദ്രഗുപ്ത മൗര്യന്റെ മകനും, ആര്യന്മാരുടെയും രണ്ടാമത്തെ ചക്രവർത്തിയുമായ സാമ്രാട് ബിന്ദുസാരൻ ഏതോ രോഗം ബാധിച്ചു കിടപ്പിലായിരിക്കുമ്പോഴത്തെ ഒരു അവസ്ഥയിലാണ് നോവൽ ആരംഭിക്കുന്നത് . അമ്പതു വർഷങ്ങൾക്കു മുൻപ് വിശാലമായ സാമ്രാജ്യത്തിനു അടിത്തറയിടുകയും പാടലീപുത്രം തലസ്ഥാനമാക്കി ഭരിച്ചിരുന്നയാളാണ് ചന്ദ്രഗുപ്തൻ. ചന്ദ്രഗുപ്തനെ രാജ്യാധികാരിയാക്കി വളർത്തികൊണ്ടുവന്ന ചാണക്യൻ എന്ന ബുദ്ധിരാക്ഷന്റെ നീക്കങ്ങളെപ്പറ്റി നമ്മൾ ധാരാളം വായിച്ചിട്ടുണ്ടല്ലോ.
അസുഖബാധിതനായ ഇപ്പോഴത്തെ രാജാവ് ഏതു നിമിഷവും മരണപ്പെടാം .അത്തരമൊരു അവസ്ഥയിൽ തന്റെ സാമ്രജ്യത്തിൽ പൊട്ടിമുളച്ചുകൊണ്ടിരിക്കുന്ന പ്രശ്നങ്ങളും ,കലാപങ്ങളും കൈകാര്യം ചെയ്യുക എന്നത് ഏതൊരു രാജാവിനും വെല്ലിവിളി തന്നെയാണ്. ബിന്ദുസാരന് നൂറു പുത്രന്മാരുണ്ട് . രാജകുമാരൻ സുഷേമൻ അടുത്ത രാജാവാകുമെന്നാണ് എല്ലവരും പ്രതീക്ഷിക്കുന്നത്. കാരണം വൈശ്യപുത്രനായതുകൊണ്ടു രാജാവിന് അശോകനുമേൽ അത്ര താല്പര്യവുമില്ല. അയാൾ മാറ്റിനിർത്തേണ്ടത് മറ്റുള്ളവരുടെയും ആവശ്യമാണ്.ബിന്ദുസാരന് ശേഷം ഇനിയാര് എന്നുള്ള ചോദ്യത്തിന്റെ ഉത്തരം തന്നെയാണ് ഈ പുസ്തകം നമുക്ക് തരുന്നത്.
ചന്ദ്രഗുപ്തന്റെ സുവർണ്ണ കാലഘട്ടത്തിൻന്റെ തകർച്ചയാണ് ഈ പുസ്തകത്തിൽ വിവരിച്ചിരിക്കുന്നത്. അധികാരത്തിനു വേണ്ടിയുള്ള അത്യാഗ്രഹവും, നാട്ടിൽ മുളച്ചു പൊന്തിയിരിക്കുന്ന അരാജകത്വവും , അടുത്ത സിംഹാസനമേറാൻ കാത്തിരിക്കുന്നവരുടെ അതിനിഗൂഢമായ അഭിലാഷങ്ങളുമൊക്കെ കൊണ്ട് അത്യതം നാടകീയത നിറഞ്ഞതാണ് അശോകത്രയം സീരീസിലെ ഈ ആദ്യ പുസ്തകം നിറയെ.
അശോകന്റെ കാലഘട്ടത്തെക്കുറിച്ചാണ് കഥയെങ്കിലും ചന്ദ്രഗുപ്ത മൗര്യന്റെയും, ചാണക്യന്റെയും ജീവിതകാലത്തെയും കിരീടപോരാട്ടങ്ങളെകുറിച്ചുള്ള ഒരു സമാന്തര ഭൂതകാലം പറഞ്ഞു പോകുന്നുണ്ട് . അലക്സാണ്ടർ ചക്രവർത്തിയോടേറ്റുമുട്ടിയ പുരുഷോത്തമനെന്ന പോറസിന്റെയും ,പോറസിനെ എതിർക്കാൻ അലക്സാണ്ടറോട് കൂട്ടുകൂടിയ അംബി രാജാവിന്റെ കഥയും നോവലിന്റെ തുടക്കത്തിൽ തന്നെ കടന്നു വരുന്നുണ്ട്. അലക്സാൻഡറും , പോറസ്സും തമ്മിലുള്ള യുദ്ധം മനോഹരമായി തന്നെ നോവലിൽ വിവരിക്കുന്നുണ്ട്.
വിശ്വാസവഞ്ചന , അധികാരരാഷ്ട്രീയം,പ്രേമം, ഗൂഢാലോചനകൾ എന്നിവ കൊണ്ട് സമൃദ്ധമാണീ നോവൽ. ജാതിയും,മതവും എങ്ങനെയാണ് അധികാര രാഷ്ട്രീയത്തിലും ,സമൂഹത്തിലും ആധിപത്യം പുലർത്തുന്നതെന്ന് നിരവധി സംഭവങ്ങൾകൊണ്ട് ഉദാഹരിക്കുന്നുണ്ട് .അത്തരം വിശദാംശങ്ങളിലൂടെ അന്നത്തെ കാലത്തും ജാതി എത്രത്തോളം പ്രശ്നങ്ങൾ സൃഷ്ടിച്ചിരുന്നുവെന്ന് മനസ്സിലാക്കാം .
ചരിത്രത്തിന്റെ പിൻബലമുണ്ടെങ്കിലും ഫിക്ഷനായി തന്നെ വായിക്കേണ്ട ഒരു പുസ്തകമാണിത് എന്ന് എഴുത്തുകാരൻ തന്നെ മുന്നറിയിപ്പ് നല്കുന്നുണ്ട്. അശോകന്റെ ജീവിതകാലത്ത് ചാണക്യൻ ജീവിച്ചിരുന്നതായുള്ള സംഭവങ്ങളൊക്കെ ഭാവന മാത്രമാണ്.മാത്രമല്ല നോവലിൽ ചേർത്തിട്ടുള്ള സാങ്കൽപ്പിക കഥാപാത്രങ്ങളുടെ പേരുകളും അക്കമിട്ടു പറയുന്നുമുണ്ട്. അതുകൊണ്ടു ഈ പുസ്തകത്തെ ചരിത്രകഥയായി തെറ്റിദ്ധരിക്കരുതെന്ന ഒരു മുൻകൂർ ജാമ്യം എഴുത്തുകാരനെടുക്കുന്നുണ്ട്.
എഴുത്തുകാരൻ ശ്രേയസ് ഭവേയുടെ ആദ്യ പുസ്തകമാണിത്. എന്നാൽ പുസ്തകം വായിച്ചു മടക്കുമ്പോൾ ഇരുത്തം വന്ന ഒരെഴുത്തുകാരന്റെ ഒരു പുസ്തകമായിട്ടേ നമുക്ക് തോന്നൂ. മലയാള വിവർത്തനം ചെയ്ത റോയ് കുരുവിളയും അതിമനോഹരമായി തനറെ കർത്തവ്യം നിർവ്വഹിച്ചിട്ടുണ്ട്. മാതൃഭൂമിയാണ് പുസ്തകം പുറത്തിറക്കിയിരിക്കുന്നത്,വില 340 രൂപാ.
എഴുത്തുലോകം 