അന്നൊരാ പുഴയുടെ തീരത്തു നിന്നു  ഞാൻ

കണ്ട സ്വപ്നങ്ങളൊക്കെയും

അവളെക്കുറിച്ചുള്ളതായിരുന്നു.

എന്നിലെ നീർമണിപൊട്ടുകളത്രയും

മറ്റാരും കാണാതെയൊളിപ്പിച്ചപ്പോഴൊക്കെയു-

മാപ്പുഴയും ഞാനും തമ്മിലന്നേ

ബന്ധുക്കളായി ചമഞ്ഞു.

അവൾക്കായി പിന്നാലെ നടന്നപ്പോളൊക്കെയും

ഞാനെന്നെ മറന്നു,

പുഴയെ മറന്നു,

മറ്റെല്ലാം മറന്നു.

ഒടുവിലായവളെങ്ങോപ്പോയി മറഞ്ഞപ്പോൾ

ആരുമില്ലാ കൂടെയെന്ന് കണ്ട് തിരികെ നടന്നപ്പോൾ

ആ പുഴയുമെങ്ങോ പോയി മറഞ്ഞിരുന്നു.

എനിക്കായി കൂട്ടിയിട്ട മണൽത്തരികൾ ബാക്കിപത്രം